பூண்டி மாதா பேராலயத்தில் ஆண்டு பெருவிழா துவக்கம்
5/7/2016 12:25:57 PM
திருக்காட்டுப்பள்ளி: தஞ்சை மாவட்டம், பூண்டியில் உள்ள மாதா பேராலயத்தில் ஆண்டு பெருவிழா நேற்று மாலை கொடியேற்றத்துடன் துவங்கியது. முன்னதாக பூண்டிமாதா சொரூபம் சிறிய சப்பரத்தில் மல்லிகை மலர்களால் அலங்கரிக்கப் பட்டு பக்தர்கள் இறைபாடல்களுடன் சுமந்து வர, மாதாவின் திருவுருவம் வரையப்பட்ட வண்ணக் கொடியுடன் பக்தர்கள் முன் சென்றனர். ஆயர் அந்தோணிசாமி முன்னிலையில் ஆயர் பீட்டர்ரெமிஜியுஸ் கொடியை புனிதப்படுத்தி கொடிமரத்தில் ஏற்றி விழாவை துவக்கி வைத்தார். அங்கு கூடியிருந்த மக்கள் ‘மாதாவே வாழ்க, பூண்டி அன்னையே வாழ்க’ என்று கோஷமிட்டனர்.இதன்பின்னர் திறந்தவெளி அரங்கத்தில் நடைபெற்ற திருப்பலி பூஜையில் ‘மரியாள் இரக்கத்தின் அன்னை’ என்ற தலைப்பில் ஆயர் பீட்டர்ரெமிஜியுஸ் மறையுரையாற்றி அருளாசி வழங்கினார். கொடியேற்றத்தை தொடர்ந்து இன்று முதல் 13ம் தேதிவரை நவநாட்கள் திருப்பலி பூஜைகளை பங்குதந்தையர்கள் நிறைவேற்றுகின்றனர்.
இறை அடியார் விழாவின் சிறப்பு அம்சமாக 14ம் தேதி மாலை 5.30 மணிக்கு பூண்டி மாதா பேராலயத்தின் முன்னாள் பங்கு தந்தை மறைந்த லூர்துசேவியர் சவரிராயனை ‘இறை அடியாராக’ (புனிதர் பட்டத்துக்கு முன்னதாக வழங்கும் பட்டம்)தமிழக ஆயர் பேரவையும், ரோம் புனிதர் பட்டம் வழங்க ஒப்புதல் அளிக்கும் ஆணையமும் வழங்கிய அறிவிப்பை குடந்தை மறைமாவட்ட ஆயர் அந்தோணிசாமி வெளியிடுகிறார்.
தொடர்ந்து லூர்துசேவியர் மற்றும் ராயப்பர் ஆகியோரின் நினைவுத்திருப்பலி பூஜைகள் நிறைவேற்றப்படும். பின்னர் குடந்தை மறைமாவட்ட ஆயர் அந்தோணிசாமி மாலை 6மணிக்கு திருவிழா சிறப்பு திருப்பலி பூஜையை நடத்தி ‘மரியாள் திருச்சபையின் அன்னை’ என்ற தலைப்பில் மறையுரையாற்றி ஆசி வழங்குகிறார். இரவு 9.00 மணிக்கு மாதாவின் அலங்கார, ஆடம்பர தேர்பவனியை புனிதப்படுத்தி ஆயர் அந்தோணிசாமி துவக்கி வைக்கிறார். இரவு வாணவேடிக்கைகள் நடைபெறும்.15ம் தேதி காலை 6 மணிக்கு ஆயர் தலைமையில் திருப்பலி பூஜையும், மாலை கொடியிறக்கமும் நடைபெறும்.
