பொதுச் செயலாளர் தேர்தலுக்கு எதிரான வழக்கு எடப்பாடி பழனிச்சாமி மீது ஓ.பன்னீர்செல்வம் தாக்கு: சென்னை உயர்நீதிமன்றத்தில் காரசார விவாதம்
3/22/2023 5:51:30 PM
சென்னை: அதிமுகவை கைப்பற்ற எடப்பாடி பழனிச்சாமி மற்றும் ஓ.பன்னீர்செல்வம் தரப்பினர் என தமிழகம் முழுவதும் இரு அணிகளாக பிரிந்து சட்டப் போராட்டம் நடத்தி வருகின்றனர். அதிமுக பொதுக்குழுவில் இருந்து ஓ.பன்னீர்செல்வம் மற்றும் அவரது ஆதரவாளர்கள் நீக்கப்பட்டனர். இதற்கு பதிலடியாக எடப்பாடி பழனிச்சாமி மற்றும் அவரது ஆதரவாளர்கள் நீக்கப்பட்டனர். அதைத் தொடர்ந்து அதிமுக பொதுக்குழுவை கூட்டியது செல்லாது என்று கூறி சென்னை உயர்நீதிமன்றம் மற்றும் உச்சநீதிமன்றத்தில் ஓ.பன்னீர்செல்வம் வழக்குத் தொடர்ந்தார். இந்த வழக்கில் பொதுக்குழு கூட்டியது செல்லும் என்று உச்சநீதிமன்றம் உத்தரவிட்டது. அதைத் தொடர்ந்து அதிமுக பொதுச் செயலாளர் தேர்தலை உடனடியாக நடத்த எடப்பாடி அணி முடிவு செய்தது.
இதற்காக கடந்த ஞாயிற்றுக்கிழமை வரை வேட்பு மனு தாக்கல் செய்யலாம் என்று அறிவிக்கப்பட்டது. இதனால் எடப்பாடி பழனிச்சாமி மட்டுமே மனு தாக்கல் செய்தார். இதனால் அவர் போட்டியின்றி பொதுச் செயலாளராக தேர்வு செய்யப்படுவார் என்று எதிர்பார்க்கப்பட்டது. இந்நிலையில் அதிமுக பொதுச் செயலாளர் தேர்தலை எதிர்த்து ஓ.பன்னீர்செல்வம் அணி சார்பில் வைத்திலிங்கம், மனோஜ்பாண்டியன், ஜே.சி.டி.பிரபாகரன் ஆகியோர் மனு தாக்கல் செய்தனர். இந்த மனு கடந்த ஞாயிற்றுக்கிழமை அவசரமனுவாக விசாரிக்க வேண்டும் என்று அவர்கள் கோரிக்கை விடுத்தனர். அதை ஏற்று ஞாயிற்றுக்கிழமை விசாரணை நடந்தது. விசாரணை முடிவில் பொதுச் செயலாளர் தேர்தல் நடைமுறைக்கு தடை விதிக்காமல், தேர்வு அறிவிப்புக்கு தடை விதித்து நீதிமன்றம் உத்தரவிட்டது. வழக்கில் இன்று விசாரணை நடைபெறும் என்று அறிவிக்கப்பட்டது. இந்தநிலையில் இந்த வழக்கில் ஓ.பன்னீர்செல்வமும் தனியாக மனு தாக்கல் செய்தார்.
இந்த மனு மீதான விசாரணை சென்னை உயர்நீதிமன்றத்தில் இன்று தொடங்கியது. விடுமுறை தினமான இன்று அவசர வழக்காக விசாரணைக்கு எடுத்துக்கொள்ளப்பட்டுள்ளது. இவ்வழக்குடன் சேர்த்து பொதுச்செயலாளர் தேர்தலுக்கு தடை கோரிய மனுக்களும் சேர்த்து விசாரிக்கப்படுகின்றன. வழக்கு தொடங்கியதும் ஓ.பன்னீர் செல்வம் தரப்பில் மூத்த வழக்கறிஞர் குருகிருஷ்ணகுமார் வாதங்களை முன் வைத்தார். அப்போது அவர் கூறியதாவது: பொதுச்செயலாளர் தேர்தலில் போட்டியிட பல நிபந்தனைகள் விதிக்கப்பட்டுள்ளன. பன்னீர்செல்வம் முதல்வராக, நிதி அமைச்சராக பதவி வகித்துள்ளார். 1977 முதல் கட்சியில் இருக்கிறார். கட்சிக்கு நெருக்கடி ஏற்பட்ட நேரங்களில் ஓ.பன்னீர்செல்வம் கட்சிக்காக முக்கிய பங்காற்றியுள்ளார். ஒருங்கிணைப்பாளர் பதவி 2026 வரை நீடிக்கிறது. எந்த வாய்ப்பும் அளிக்காமல் எந்த காரணமும் கூறாமல் கட்சியில் இருந்து நீக்கியுள்ளனர், இது தன்னிச்சையானது, நியாயமற்றது. ஒருங்கிணைப்பாளர், இணை ஒருங்கிணைப்பாளர் பதவிகளை கலைக்கும் முடிவு தன்னிச்சையானது. இவ்வாறு ஓ.பன்னீர்செல்வம் தரப்பு வழக்கறிஞர் வாதங்களை முன் வைத்துள்ளார். உயர்நீதிமன்றத்தில் இரு தரப்பும் காரசார விவாதங்களை முன் வைத்துள்ளன.
