நடுரோட்டில் தீப்பிடித்து நாசமான கார்: 2 பேர் படுகாயம்
3/24/2023 5:34:57 PM
திண்டுக்கல்: சேலம் மாவட்டம், மேட்டூரை சேர்ந்தவர் பொன்னம்பலம்(78). இவரது மனைவி மாமியார் கீதா(66), மருமகன் சந்தோஷ்குமார்(46). மதுரையில் உள்ள தனியார் கண் மருத்துவமனையில் சிகிச்சை பெறுதற்காக, இன்று அதிகாலை ஒரு காரில் பொன்னம்பலம் கிளம்பினார். உடன் கீதா, சந்தோஷ்குமார் ஆகியோரும் இருந்தனர். காரை சாந்தப்பன்(33) என்பவர் ஓட்டினார்.
திண்டுக்கல் மாவட்டம், வேடசந்தூர் அருகே ரெங்கநாதபுரம் மின் அலுவலகம் எதிரில் காலை 8 மணியளவில் வந்தபோது, திடீரென கட்டுப்பாட்டை இழந்த கார், பாலத்தின் மீது மோதி சாலையின் நடுவில் தலைக்குப்புற கவிழ்ந்தது. தொடர்ந்து காரில் தீப்பற்றி எரிய துவங்கியது. காரிலிருந்து சந்தோஷ்குமார் மற்றும் கீதா உடனடியாக வெளியேறினர். கார் இடிபாடுகளில் பொன்னம்பலம் மற்றும் சாந்தப்பன் சிக்கி கொண்டனர். இதனைப்பார்த்து அதிர்ச்சியடைந்த அப்பகுதிமக்கள் உடனடியாக செயல்பட்டு, இடுபாடுகளில் சிக்கி தவித்த பொன்னம்பலம் மற்றும் சாந்தப்பனை மீட்டனர்.
இருப்பினும் பொன்னம்பலத்தின் இரண்டு கால்களும், சாந்தப்பனின் முழங்காலுக்கு கீழும் பலத்த தீக்காயம் ஏற்பட்டது. வேடசந்தூர் தீயணைப்பு நிலையத்தினர் சம்பவ இடத்திற்கு வந்து காரில் பற்றிய தீயை அணைத்தனர். இருப்பினும் கார் முற்றிலும் எரிந்து சேதமடைந்தது. தகவலறிந்து வந்த போலீசார், தீக்காயமடைந்த பொன்னம்பலம் மற்றும் சாந்தப்பனை மீட்டு வேடசந்தூர் அரசு மருத்துவமனைக்கு சிகிச்சைக்கு அனுப்பி வைத்தனர். அங்கு முதலுதவி சிகிச்சைக்கு பின் மேல் சிகிச்சைக்கு திண்டுக்கல் அரசு மருத்துவமனைக்கு இருவரும் அனுப்பி வைக்கப்பட்டனர். விபத்து குறித்து போலீசார் வழக்குப்பதிந்து விசாரணை நடத்தி வருகின்றனர்.
