‘‘என் கணவரை துடிதுடிக்க கொன்ற அனைவரையும் தூக்கில் போடுங்கள்’’: ஜெகன் மனைவி கண்ணீர்
3/24/2023 5:27:33 PM
கிருஷ்ணகிரி: என் கணவனை கொலை செய்தவர்களுக்கு, தூக்கு தண்டனை வழங்க வேண்டும்’ என, கிருஷ்ணகிரியில் காதல் திருமணம் செய்ததால் கொலை செய்யப்பட்ட ஜெகனின் மனைவி சரண்யா கூறினார். கிருஷ்ணகிரியில் காதல் திருமணம் செய்த ஜெகன் என்ற வாலிபர், கடந்த 21ம் தேதி, அவரது மாமனார் சங்கர் மற்றும் சிலரால் வெட்டி படுகொலை செய்யப்பட்டார். இந்த காட்சிகள் சமூக வலைதளங்களில் வைரலானது. இதுகுறித்து சட்டசபை விவாதம் வரை சென்ற நிலையில், நேற்று கொலை செய்யப்பட்ட ஜெகனின் மனைவி சரண்யா, நிருபர்களிடம் கூறியதாவது: எனக்கு திருமணமாகி இரு மாதங்கள் கூட நிறைவடையவில்லை. அதற்குள் இப்படி ஆகிவிட்டது.
நான் திருமணமாகி சென்ற நாள் முதல், என் வீட்டு ஞாபகம் வந்தால் தனிமையில் அழுவேன். அப்போது என்னை சமாதானப்படுத்தி, என்னுடன் சேர்ந்து என் கணவரும் அழுவார். என்னை ராணி மாதிரி பார்த்துக்கொண்டார். அப்படிப்பட்டவரை துடிதுடிக்க கொன்று விட்டார்களே. அதற்கு என்னை கொன்றிருக்கலாம். ஜெகனை மறக்கச் சொல்லி, என் தாய் எட்டி உதைத்த போதும், சித்ரவதை செய்த போதும், நான் அதை பொறுத்துக் கொண்டு திருமணம் செய்தேன். என் வாழ்க்கையை கெடுத்து விட்டார்கள். இதில், சம்பந்தப்பட்டவர்கள் அனைவரையும் தூக்கில் போடவேண்டும். இவ்வாறு கதறி அழுதுக்கொண்டே கூறினார்.
