பள்ளி, கல்லூரி மாணவர்களுக்கு போதைப் பொருள் விற்பனை: 5 பேர் கும்பல் கைது
3/21/2023 5:58:45 PM
திருவனந்தபுரம்: திருவனந்தபுரத்தில் பள்ளி, கல்லூரி மாணவர்களுக்கு போதைப் பொருள் விற்பனை செய்து வந்த 5 வாலிபர்களை போலீசார் கைது செய்தனர். திருவனந்தபுரம் வலியதுறை பகுதியில் ஒரு கும்பல் போதைப் பொருள் விற்பனை செய்து வருவதாக போலீசுக்கு ரகசிய தகவல் கிடைத்தது. இதையடுத்து நேற்று அந்த பகுதியில் போலீசார் திடீர் சோதனை நடத்தினர். இதில் இக்னேஷியஸ் (23) என்பவரது வீட்டில் இருந்து எம்டிஎம்ஏ போதைப் பொருள் கைப்பற்றப்பட்டது. இதையடுத்து போலீசார் அவரை கைது செய்து விசாரணை நடத்தினர். அதில், அவரது தலைமையிலான கும்பல் கர்நாடகா, தமிழ்நாட்டின் பல்வேறு பகுதிகளில் இருந்து போதைப் பொருளை வாங்கி கேரளாவுக்கு கடத்தி பள்ளி மற்றும் கல்லூரி மாணவர்களுக்கு விற்பனை செய்து வந்தது தெரியவந்தது. இதையடுத்து அவரது கூட்டாளிகளான முகம்மது அஸ்லம் (23), ஜான் பாப்பிஸ்ட் (24), ஜெரோம் (25), விஷ்ணு (20) ஆகிய 4 பேரை போலீசார் கைது செய்தனர். விசாரணைக்குப் பிறகு 5 பேரையும் போலீசார் திருவனந்தபுரம் நீதிமன்றத்தில் ஆஜர்படுத்தி சிறையில் அடைத்தனர்.
