மது குடிப்பதை தட்டிகேட்டதால் மனைவியை துண்டு துண்டாக வெட்டி வீசி எறிந்த கணவன்: நாய்களிடம் இருந்து உடல் பாகங்களை மீட்ட போலீஸ்
3/20/2023 5:40:41 PM
நாளந்தா: மது குடிப்பதை தட்டிக் கேட்டதால் மனைவியை துண்டு துண்டாக வெட்டி வீசிய கணவனை போலீசார் கைது செய்த நிலையில், நாய்களிடம் இருந்து அந்த பெண்ணின் உடல் பாகங்களை மீட்டு விசாரிக்கின்றனர்.
பீகார் மாநிலம் நாளந்தா பகுதியை சேர்ந்த கூலித்தொழிலாளி நிதீஷ் குமார் (40) - சங்கீதா தேவி (35) தம்பதி வசித்து வந்தனர். இவர்களுக்கு இரண்டு மகன்கள் உள்ளனர். மதுபோதைக்கு அடிமையான நிதிஷ் குமார், அடிக்கடி குடித்துவிட்டு வந்து தனது மனைவியிடம் தகராறு செய்து வந்தார். இதனால் தம்பதிக்குள் அடிக்கடி குடும்ப சண்டை ஏற்படுவது வழக்கம் இந்நிலையில் கடந்த 13ம் தேதி முதல் தனது மனைவியை காணவில்லை என்று, தார்தாரி போலீசில் நிதிஷ் குமார் புகார் அளித்தார். அதையடுத்து போலீசார் வழக்குபதிந்து சங்கீதா தேவியை தேடி வந்தனர். இதுகுறித்து போலீஸ் டி.எஸ்.பி கிருஷ்ணா முராரி கூறுகையில், ‘சங்கீதா தேவி மாயமானது தொடர்பாக அவரது கணவரிடம் தீவிர விசாரணை நடத்தப்பட்டது.
அவரது பதில் முன்னுக்கு பின் முரணாக இருந்ததால் தீவிர விசாரணைக்கு உட்படுத்தப்பட்டார். போதை பழக்கத்தை கைவிடுமாறு தனது மனைவி கட்டாயப்படுத்தியதால், அவரை கொன்றதை ஒப்புக் கொண்டார். பின்னர் சங்கீதா தேவியின் உடலை துண்டுதுண்டாக வெட்டி பல்வேறு பகுதிகளில் வீசி எறிந்துள்ளார். வயல்வெளியில் அந்தப் பெண்ணின் தலையும், இரண்டு கால்களும் கிடந்தன. உடலின் மற்ற பாகங்கள் துண்டு துண்டாக வெட்டப்பட்ட நிலையில் ஊருக்கு ஒதுக்குப்புறமான இடங்களில் கிடந்தன. அவற்றை நாய்கள் தின்றுகொண்டிருந்தன. அவற்றையெல்லாம் சேகரித்து பிரேத பரிசோதனைக்கு அனுப்பி வைத்துள்ளோம். குற்றம்சாட்டப்பட்ட நிதிஷ் குமாரை கைது செய்து மேலும் விசாரணை நடத்தி வருகிறோம்’ என்றார்.
