ஆட்டோவில் கடத்தி சென்று சிறுமி கூட்டு பலாத்காரம்: 2 கொடூரன்கள் கைது
3/16/2023 5:20:56 PM
தென்காசி: தென்காசியில் சிறுமியை கூட்டு பாலியல் பலாத்காரம் செய்த இரண்டு பேரை போலீசார் கைது செய்தனர். மேலும் ஒருவரை தேடி வருகின்றனர். தென்காசி அருகே உள்ள கிராம பகுதியை சேர்ந்த 17 வயது சிறுமி ஒருவர் நேற்று முன்தினம் இரவு செங்கோட்டை போலீஸ் நிலையம் அருகே செல்போன் கடை ஒன்றில் தனது செல்போனை பழுது பார்ப்பதற்காக கொடுத்து விட்டு வீட்டிற்கு செல்வதற்காக காத்திருந்தார். அப்போது அவ்வழியாக ஆட்டோவில் வந்த மூன்று பேர் ஆட்டோவில் ஏறுமாறும், வீட்டில் இறக்கி விடுவதாகவும் கூறியுள்ளனர்.
இதனை நம்பி சிறுமி ஆட்டோவில் ஏறியுள்ளார். ஆனால், அந்த ஆட்டோ அவரது சொந்த ஊருக்கு செல்லவில்லை. இதை பார்த்து அதிர்ச்சியடைந்த சிறுமி, இது குறித்து அவர்களிடம் கேட்டுள்ளார். அப்போது அவரது வாயில் துணியை அழுத்தி கட்டி சிறுமியை கடத்தி சென்றனர். தொடர்ந்து, தென்காசி முக்கூடல் உப மின் நிலையம் அருகில் உள்ள மறைவான இடத்திற்கு சிறுமியை கொண்டு சென்ற மூவரும் கூட்டு பலாத்காரத்தில் ஈடுபட்டதாக தெரிகிறது. நேற்று அதிகாலை சுமார் 3 மணியளவில் தென்காசி-செங்கோட்டை சாலை சீவலப்பேரி குளம் அருகில் உள்ள பேருந்து நிறுத்தத்தில் இறக்கி விட்டு தப்பி சென்றனர்.
அப்போது அங்கு வலி தாங்க முடியாமல் மிகவும் களைப்புடன் வந்த சிறுமியை ரோந்து பணியில் ஈடுபட்டிருந்த போலீசார் விசாரித்தனர். அப்போது, மூன்று பேர் சேர்ந்து கடத்தி சென்று கூட்டு பலாத்காரம் செய்தது தெரிய வந்தது. இதனை அடுத்து அவரை மருத்துவமனைக்கு அனுப்பி வைத்தனர். இதைதொடர்ந்து போலீசார் நடத்திய விசாரணையில், ‘தென்காசி கீழ வாலிபன் பொத்தையைச் சேர்ந்த தங்கத்துரை மகன் ராஜி என்ற அந்தோணி (20), தைக்கா தெருவை சேர்ந்த சுடலை முத்து மகன் மாதவன் (33), வெங்கடேஷ் (34) ஆகிய மூவரும் இந்த சம்பவத்தில் ஈடுபட்டது தெரிய வந்தது. இதையடுத்து தென்காசி அனைத்து மகளிர் போலீசார் வழக்கு பதிவு செய்து ராஜி மற்றும் மாதவன் ஆகிய இருவரையும் கைது செய்தனர். வெங்கடேசை தேடி வருகின்றனர்.
