காதலனால் புரோக்கராக மாறிய இன்ஜினியரிங் மாணவி; சக மாணவிகளை பாலியல் தொழிலில் ஈடுபடுத்திய கொடூரம்: போலீசாரிடம் சிக்கியது குறித்து பரபரப்பு பின்னணி
3/15/2023 5:55:31 PM
சென்னை: காதலனால் பாலியல் புரோக்கராக மாறிய இன்ஜினியரிங் மாணவி ஒருவர், தன்னுடன் படிக்கும் சக மாணவிகளுக்கு ஆசை வார்த்தை கூறி பாலியல் தொழிலில் ஈடுபடுத்திய சம்பவம் சென்னையில் பரபரப்பை ஏற்படுத்தியுள்ளது. சென்னை எழும்பூர் பூந்தமல்லி நெடுஞ்சாலையில் உள்ள தனியார் தங்கும் விடுதி ஒன்றில் இளம் பெண்களை வைத்து பாலியல் தொழில் நடப்பதாக விபச்சார தடுப்பு பிரிவு போலீசாருக்கு ரகசிய தகவல் கிடைத்தது. அதன்படி விபச்சார தடுப்பு பிரிவு இன்ஸ்பெக்டர் பாபு தலைமையிலான போலீசார் நேற்று முன்தினம் சம்பந்தப்பட்ட தனியார் விடுதியில் அதிரடி சோதனை நடத்தினர். அப்போது, புதுச்சேரி மாநிலம் சிவராந்தகம்பேட்டையை சேர்ந்த பெண் புரோக்கர் ஒருவர் தனது காதலன் பிரகாஷ் என்பவருடன் இணைந்து பாலியல் தொழில் நடத்தி வந்தது தெரியவந்தது.
அதைதொடர்ந்து விபச்சார தடுப்பு பிரிவு போலீசார் பெண் புரோக்கர் மற்றும் பாலியல் ெதாழிலுக்கு உடந்தையாக இருந்த கீழ்ப்பாக்கம் முதல் தெருவை சேர்ந்த பிரேம்தாஸ்(30) என்பவரை அதிரடியாக கைது செய்தனர். அவர்களிடம் இருந்து பெங்களூரு, மும்பை, தர்மபுரியை சேர்ந்த 3 இளம் பெண்கள் மீட்கப்பட்டனர். முக்கிய குற்றவாளியான பெண் புரோக்கரின் காதலன் பிரகாஷை போலீசார் தேடி வருகின்றனர். பின்னர் கைது செய்யப்பட்ட இளம் பெண் புரோக்கரிடம் போலீசார் விசாரணை நடத்திய போது, பல்வேறு அதிர்ச்சி சம்பவங்கள் வெளியானது.
பெண் புரோக்கரிடம் நடத்திய விசாரணை குறித்து போலீசார் கூறியதாவது: பாலியல் வழக்கில் கைதான ெபண் புதுச்சேரி மாநிலத்தை சேர்ந்தவர். இவர் 12ம் வகுப்பு படிக்கும் போது, பேஸ்புக் மூலம் சென்னையை சேர்ந்த பிரகாஷ் என்பவர் அறிமுகமானார்.
இந்த அறிமுகம் நாளடைவில் காதலாக மாறியது. இருவரும் 4 ஆண்டுகளுக்கு முன்பு திருமண நிகழ்ச்சி ஒன்றில் நேரடியாக சந்தித்துள்ளனர். இந்த சந்திப்புக்கு பிறகு இருவரும் பல இடங்களுக்கு சென்று உல்லாசமாக சுற்றி வந்துள்ளனர். பின்னர் பிரகாஷ் ஆலோசனைப்படி இளம் பெண் சென்னை நுங்கம்பாக்கத்தில் உள்ள பிரபல கல்லூரி ஒன்றில் இன்ஜினியரிங் 3ம் ஆண்டு தற்போது படித்து வருகிறார். பிரகாஷ் சிறு வயதில் இருந்து பாலியல் புரோக்கர்களுக்கு உதவியாக இருந்து வந்துள்ளார். இதனால் தனது காதலியான கல்லூரி மாணவி மூலம் கடந்த 2 ஆண்டுகளாக தனியாக பாலியல் தொழில் செய்து வருகிறார். தனது காதலனுக்கு உதவியாக கல்லூரி மாணவியும் தன்னுடன் படிக்கும் சக மாணவிகளுக்கு கடனாக பணத்தை கொடுத்து அதன் மூலம் பண ஆசையை மாணவிகளுக்கு காட்டி பாலியல் தொழிலுக்கு அவர்களை கட்டாயப்படுத்தி ஈடுபடுத்தியுள்ளார்.
அந்த வகையில் கடந்த 2 ஆண்டுகளில் தன்னுடன் கல்லூரியில் படிக்கும் மாணவிகள் பலர் பாலியல் தொழிலுக்கு உட்படுத்தி அதன் மூலம் லட்சக்கணக்கான பணத்தை அவர் தனது காதலன் மூலம் சம்பாதித்துள்ளார். கல்லூரி மாணவிகளை கேட்கும் தனது வாடிக்கையாளர்களிடம் ஒரு இரவுக்கு ரூ.25 ஆயிரம் மூலம் ரூ.30 ஆயிரம் வரை பணம் வசூலித்துள்ளார். பிறகு பாலியல் ெதாழிலுக்கு வரும் மாணவிகளுக்கு ஒரு இரவுக்கு வெறும் ரூ.3 ஆயிரம் மட்டும் கொடுத்துவிட்டு, மீதி பணத்தை இவர்கள் சம்பாதித்து வந்துள்ளனர். பாலியல் புரோக்கர் பிரகாஷ் வாடிக்கையாளர்களிடம் வாங்கும் பணம் எல்லாம் தனது காதலியான கல்லூரி மாணவியின் ‘ஜிபே’ மூலமே பெற்றுள்ளார். அதற்கான அனைத்து ஆதாரங்களும் கல்லூரி மாணவியின் செல்போனில் இருந்து பெறப்பட்டுள்ளது.
இதன் மூலம் ஒரு மாதத்திற்கு சரசரியாக ரூ.5 முதல் ரூ.10 லட்சம் வரை இருவரும் சம்பாதித்துள்ளதாக தெரியவந்துள்ளது. மேலும், கல்லூரி மாணவி தனது காதலனுடன் சென்னை, புதுச்சேரி பகுதியில் கடந்த 2 ஆண்டுகளாக யாருக்கும் எந்த சந்தேகமும் வராதபடி பாலியல் தொழில் செய்து வந்துள்ளது விசாரணை மூலம் தெரியவந்துள்ளது. கைதான பெண் கல்லூரி மாணவி என்பதால், அவரை உடனே கைது செய்யாமல் பல நாட்கள் நோட்டமிட்டு பாலியல் புரோக்கர் என உறுதி செய்த பிறகே கைது செய்துள்ளோம். இந்த வழக்கில் தலைமறைவாக உள்ள காதலன் பிரகாஷை கைது செய்ய அனைத்து நடவடிக்கைகளும் எடுக்கப்பட்டு வருகிறது. பாதிக்கப்பட்ட மாணவிகள் யார் யார் என்பது குறித்து விசாரணை நடத்தப்பட்டு வருகிறது. அதன் பிறகு பாதிக்கப்பட்ட மாணவிகளை ரகசியமாக அழைத்து அவர்களுக்கு மனதத்துவ நிபுணர்கள் மூலம் உரிய ஆலோசனைகள் வழங்க நடவடிக்கை எடுக்கப்பட்டு வருகிறது. இவ்வாறு போலீசார் தெரிவித்தனர்.
